Saturday, May 28, 2011

தாய்லாந்து சினிமா: Haunted Room "அறையின் தனிமைக்குள் படிந்திருக்கும் மௌனம்"

"ஜப்பானிய சிறுவர்களுக்கும் இளைஞர்களுக்கும் விநோதமான
ஒரு பழக்கம் தொடங்கியிருந்த காலக்கட்டம்.
ஒரு தனிமையான அறைக்குள் தன்னைச் சுயமாக அடைத்துக்கொண்டு
வீட்டிலுள்ள மனிதர்களைச் சந்திக்காமல், பள்ளிக்குச் செல்ல விருப்பமில்லாமல்
9 வருடத்திற்கு மேலாக சுயவதைக்கு ஆளாகியிருந்தார்கள்.
இவர்களை ஜப்பானிய அரசு Hikikoman என அடையாளப்படுத்தியது."

நாம் அடிக்கடி வீட்டிற்கு வெளியேயும் அல்லது வீட்டிற்குள்ளேயும் பரவலாகக் காணமுடியாத குழந்தைகள் இருக்கவே செய்கிறார்கள். உறவுக்காரர்கள் நண்பர்கள் வீடு தேடி வரும்போது அறைக்குள் சென்று கதவைச் சாத்திக்கொண்டு நம் பார்வையிலிருந்து நீங்கிவிடும் குழந்தைகளைப் பார்த்ததுண்டா? அவர்கள் எப்பொழுதும் சமூகத்திடமிருந்தும் சக மனிதர்களிடமிருந்தும் தனித்திருக்கவே விரும்புகிறார்கள்.